پاکستان تحریک انصاف (پی ٹی آئی) نے کراچی میں ریلی نکالی۔ ترجمان پی ٹی آئی کا دعویٰ ہے کہ پولیس نے ریلی پر لاٹھی چارج کیا اور شہر کے مختلف علاقوں سے 29 سے زائد کارکنان کو گرفتار کیا، دوسری طرف لنڈی کوتل میں بھی پولیس نے تحریک انصاف کے 5 کارکنوں کو پکڑ لیا۔
کراچی میں پاکستان تحریک انصاف کے کارکنان نے نرسری سے نمائش تک بائیک ریلی نکالی۔
ترجمان پی ٹی آئی کے مطابق نرسری شارع فیصل پر پولیس نے ریلی پر لاٹھی چارج کیا۔
پاکستان تحریک انصاف کے ترجمان نے مزید بتایا کہ پولیس نے کارساز کے مقام سے 6 کارکنان کو گرفتار کرلیا۔
ترجمان کا مزید کہنا تھا کہ شارع فیصل، شاہراہ قائدین اور نمائش چورنگی سے بھی کارکنان کو گرفتارکیا گیا۔
دوسری جانب لنڈی کوتل میں یس کلب کے باہر پی ٹی آئی نے مظاہرہ کیا۔
پولیس نے دفعہ 144 کی خلاف وزری پر پاکستان تحریک انصاف کے پانچ کارکن گرفتار کرلیے۔
پولیس کا کہنا ہے کہ ضلع خیبر میں جلسے جلسوں پر پابندی کے باوجود پی ٹی آئی کارکن مظاہرہ کر رہے تھے، شرکا نے نگراں حکومت کے خلاف شدید نعرے بازی بھی کی۔
