فیصل آباد میں دفعہ ایک سو چوالیس کی خلاف ورزی پر پی ٹی آئی کے چار سو سے زائد کارکنان کو گرفتار کرلیا گیا، ان کے ساتھ ایم پی اے بشارت ڈوگر کو بھی حراست میں لے لیا گیا، کارکنان کی سرگودھا روڈ پر پولیس سے جھڑپ بھی ہوئی۔

سیالکوٹ: تحریک انصاف کے کارکنوں نے پولیس کو چکمہ دے دیا

پولیس جناح ہاؤس اور ریحانہ ڈار کے گھر باہر کھڑی رہی ، تحریک انصاف کی ریلی ریحانہ ڈار کی قیادت میں خواجہ صفدد سے نکل آئی ، ریلی میں خواتین کارکنان شریک تھیں۔

ریلی کو دیکھتے ہی پولیس نے پی ٹی آئی کارکنان پر دھاوا بول دیا، اس دوران پولیس اور تحریک انصاف کی خواتین کے درمیان ہاتھا پائی بھی ہوئی ہے۔

پی ٹی آئی رہنما ریحانہ ڈار نے کہا کہ ہم پرامن احتجاج کے لئے نکلے ہیں، بانی پی ٹی آئی کے لئے جان بھی حاضر ہے، پولیس نے خواتین کارکنان کو گھسیٹ کر قیدیوں کی وین میں ڈال دیا ہے، حکومت کو کس بات کا خوف ہے؟ میں عمران خان کے لئے گرفتاری دینے کے لئے تیار ہوں ۔

پی ٹی آئی ریلی کے شرکا نے ڈی چوک پہنچنے کاعزم ظاہر کیا، اس موقع پر پولیس نے تین خواتین کو گرفتار کرلیا ، تاہم ریحانہ ڈار نے پولیس وین کا راستہ روک لیا۔

سیالکوٹ پولیس کے مطابق شہر میں دفعہ 144 کے تحت جلسے جلوس اورریلیاں نکالنے پر مکمل پابندی ہے۔

دوسری جانب سربراہ سنی اتحاد کونسل حامد رضا اور عمر ڈار کی قیادت میں سبلائم چوک سے پی ٹی آئی کے کارکنان اسلام آباد روانہ ہوگئے، پولیس نے پی ٹی آئی رہنما ڈسٹرکٹ بار ایسوسی ایشن کے صدر سہیل اقبال ہرڑ کو حراست میں لے لیا ہے۔

اوکاڑہ میں تھانہ صدر پولیس نے پی ٹی آئی کے کارکنان کا اسلام آباد احتجاج میں جانا ناکام بنادیا۔ بائی پاس سے گزرتے ہوئے 20 کارکنان پولیس کے ہتھے چڑھ گئے۔ گرفتار کارکنان کا تعلق ضلع اوکاڑہ، ساہیوال، پاکپتن اور دیپالپور سے ہے۔

پولیس ذرائع نے بتایا کہ گرفتار کارکنان میں حمزہ، سید جعفر، اعجاز، تراب علی وغیرہ شامل ہیں۔

گرفتار کارکنان مہر عبدالستار ٹکٹ ہولڈر کی سربراہی میں اسلام آباد جا رہے تھے، مہر عبدالستار گرفتاری سے بچ نکلنے میں کامیاب ہو گئے، پولیس نے مختلف دفعات کے تحت مقدمہ درج کرلیا۔

اس کے علاوہ اوکاڑہ میں پی ٹی آئی کے احتجاج سے قبل ہی پولیس نے پھرتیاں دکھاتے ہوئے پی ٹی آئی کے 81 کارکنان کو گرفتار کرلیا، پولیس کی جانب سے کارکنوں کی گرفتاریوں کا سلسلہ تاحال جاری ہے۔

اوکاڑہ میں قومی شاہراہ سمیت تمام خارجی و داخلی راستے بلاک ہیں۔